ÆВЫДЫ-ВЫДОН РÆСТÆГ

Ахæм рæстæг, дам, уыд, уæйгуытæ, хæйрæджытæ æмæ адæм иумæ куы цардысты, адæм дурæй, хъилæй хæцын куы нæма зыдтой æмæ уæйгуытæ æмæ хæйрæджытæн хъалон куы фыстой, уæд. Хъалон та фыстой удгоймæгтæй: фарастгæйттæ, æвдгæйттæ, æртыгæйттæ. Кæмæн цавæр хъалон фыстой, уымæ гæсгæ сæ хуыдтой фарастсæронтæ, авдсæронтæ, æртæсæронтæ.

Уастырджи адæмы сахуыр кодта дур æмæ хъилæй хæцын, æмæ уæйгуытæ æмæ хæйрæджытæй фервæзтысты. Фæлæ та уæйгуыты бæсты æрбадтысты: фарастсæроны бæсты – залым, авдсæроны бæсты – æлдар, æртæсæроны бæсты – Ченджы хъул, хæйрæджыты бæсты – базаргæнæг æмæ ныр дæр знаггад кæнынц фæллойгæнæгæн.

кæс «АРВЫ ДУАР»-Ы СÆРГÆНДТÆ